閩南語童謠 集整 （五）

西北雨

西北雨，直直落。

鯽仔魚，欲娶某。

鮕代兄，拍鑼鼓。

媒人婆，土虱嫂。

日頭暗，尋無路。

趕緊來，火金姑。

做好心，來照路。

西北雨，直直落。

西北雨，直直落，

白鷺鷥，來趕路。

繙山嶺，過谿河。

尋無巢，跋一倒。

日頭暗，欲怎好。

土地公，土地婆，

做好心，來帶路。

西北雨，直直落。

丟沙袋

一放雞，二放鴨，

三分開，四做堆，

五搭胸，六拍手，

七圍牆，八摸鼻，

九揪耳，十拍腳，

十一拍土腳，

十二攏縂沙。

十二生肖相歌

一鼠賊仔名，

二牛駛犁兄。

三虎爬山坪，

四兔遊東京。

五龍皇帝命，

六蛇予人驚。

七馬走兵營，

八羊食草嶺。

九猴爬樹頭，

十雞啼三聲。

十一狗仔吠契兄，

十二豬是菜刀命。

一年仔倥倥

一年仔倥倥，

二年仔孫悟空，

三年仔吐劍光，

四年仔愛膨風，

五年仔上帝公，

六年仔閻羅王，閻羅王。

火車

火車蔔行東港橋，

瘉行瘉走瘉咧叫。

一聲短來一聲長，

真賢搖。

搖一下來，搖一下去，

嗶噗趒。

火車蔔行西螺橋，

瘉行瘉走瘉愛搖。

鶯歌若過是板橋，

真賢搖。

阿嬤的話

厝後一條谿，

谿邊一片地。

阿母想欲種菜頭，

阿爸想要種西瓜。

阿母講，菜頭煮香香，

呷飯有儅配。

阿爸講，西瓜甜甜湯閣濟，

會儅提去賣。

兩個搶搶滾，

阿嬤才講話，

恁兩個，毋儅花，

彼片地，

我欲畱乎阮孫放風吹。

放大砲

囝仔人，放大砲，

心肝嗶波跳。

點著火，趕緊跑，

有人掩耳仔，

有人匿樹後。

咦，哪會猶未響，

走去看。

碰啊一聲，

逐個驚甲繙筋鬭。

打馬膠

打馬膠，粘著跤，

叫阿爸，買豬腳。

豬腳箍仔滾爛爛，

飫鬼囡仔流嘴涎。

白河種蓮花

白河種蓮花，

種到一四界。

葉青青，開紅花，

歸大片擾是花。

美到親像畫，

蓮子佮蓮花，

産品擺歸街。

遊客真正濟，

買産品兼賞花。

童謠，是母語語境下的地方特色産物。

每一句滿滿都是家鄕的味道，童謠如果消退了，不僅是每一個家鄕的悲哀，也是地方傳統文化的衰退。